wo mere qalb-o-ruh ko shadab kar gaya

vo mere qalb-o-rūh ko shādāb kar gayā

phir is tarah gayā mujhe betāb kar gayā

kājal bhī niiñd kā mirī āñkhoñ se le uḌā

ḳhvāboñ meñ aa ke vo mujhe be-ḳhvāb kar gayā

us ne to iztirāb ke ma.anī sujhā diye

aisī nigāh kī mujhe betāb kar gayā

jins-e-girāñ samajh ke nahīñ dekhtā koī

mujh ko vo ek jauhar-e-nāyāb kar gayā

jauf-e-sadaf samajh ke paḌī abr kī nazar

thī sat.h-e-āb par vo tah-e-āb kar gayā

baaqī rahe na bām-o-darīche na hī fasīl

kyā haal mere dil kā ye sailāb kar gayā

sāhir thā devtā thā koī but-tarāsh thā

patthar thī ek 'bāno' vo sīmāb kar gayā

wo mere qalb-o-ruh ko shadab kar gaya

phir is tarah gaya mujhe betab kar gaya

kajal bhi nind ka meri aankhon se le uDa

KHwabon mein aa ke wo mujhe be-KHwab kar gaya

us ne to iztirab ke mani sujha diye

aisi nigah ki mujhe betab kar gaya

jins-e-giran samajh ke nahin dekhta koi

mujh ko wo ek jauhar-e-nayab kar gaya

jauf-e-sadaf samajh ke paDi abr ki nazar

thi sath-e-ab par wo tah-e-ab kar gaya

baqi rahe na baam-o-dariche na hi fasil

kya haal mere dil ka ye sailab kar gaya

sahir tha dewta tha koi but-tarash tha

patthar thi ek 'bano' wo simab kar gaya