wo meri bazm mein aae the yun naqab ke sath

vo merī bazm meñ aa.e the yuuñ naqāb ke saath

ho jaise abr kā TukḌā bhī māhtāb ke saath

jo maiñ ne kah diyā kāfir-adā to kyuuñ bigḌe

zamāna tum se hai vāqif isī ḳhitāb ke saath

ye maanā merī ḳhatā thī ki dil lagā baiThā

nazar tum aa.e the kyuuñ fitna-e-shabāb ke saath

diyā jo muñh se lagā kar to khiñch ga.ī tasvīr

maiñ pī gayā huuñ tumheñ bhī usī sharāb ke saath

hai ashk āñkhoñ se jaarī to dil hai shoa.la-fishāñ

ajiib rabt hai ātish kā mauj-e-āb ke saath

samajh meñ aa na sakā jis kā falsafa ab tak

hurūf-e-dil kā ta.alluq hai us kitāb ke saath

guloñ pe qatra-e-shabnam kī zindagī kab tak

fanā hai jis ke muqaddar meñ āftāb ke saath

wo meri bazm mein aae the yun naqab ke sath

ho jaise abr ka TukDa bhi mahtab ke sath

jo main ne kah diya kafir-ada to kyun bigDe

zamana tum se hai waqif isi KHitab ke sath

ye mana meri KHata thi ki dil laga baiTha

nazar tum aae the kyun fitna-e-shabab ke sath

diya jo munh se laga kar to khinch gai taswir

main pi gaya hun tumhein bhi usi sharab ke sath

hai ashk aankhon se jari to dil hai shoala-fishan

ajib rabt hai aatish ka mauj-e-ab ke sath

samajh mein aa na saka jis ka falsafa ab tak

huruf-e-dil ka talluq hai us kitab ke sath

gulon pe qatra-e-shabnam ki zindagi kab tak

fana hai jis ke muqaddar mein aaftab ke sath