wo meri jaan hai dil se kabhi juda na hua

vo merī jaan hai dil se kabhī judā na huā

ki us kā ġham hī mirī ziist kā bahā na huā

nazar ne jhuk ke kahā mujh se kyā dam-e-ruḳhsat

maiñ sochtā huuñ ki kis dil se vo ravāna huā

nam-e-sabā mai-e-mahtāb itr-e-zulf-e-shamīm

vo kyā gayā ki koī kārvāñ ravāna huā

vo yaad yaad meñ jhalkā hai aa.ine kī tarah

is aa.ine meñ kabhī apnā sāmnā na huā

vo chand sā.ateñ jo us ke saath guzrī haiñ

unhī kā daur rahā aur jāvedāna huā

maiñ us ke hijr kī tārīkiyoñ meñ Duubā thā

vo aayā ghar meñ mire aur charāġh-e-ḳhāna huā

vo lauT aayā hai yā merī ḳhud-farebī hai

nigāh kahtī hai dekhe use zamāna huā

maiñ apne dard kī nisbat ko dil samajhtā huuñ

qafas jo TuuT gayā merā āshiyāna huā

usī kī yaad hai sarmāya-e-hayāt 'zafar'

nahīñ to merā hai kyā maiñ huā huā na huā

wo meri jaan hai dil se kabhi juda na hua

ki us ka gham hi meri zist ka baha na hua

nazar ne jhuk ke kaha mujh se kya dam-e-ruKHsat

main sochta hun ki kis dil se wo rawana hua

nam-e-saba mai-e-mahtab itr-e-zulf-e-shamim

wo kya gaya ki koi karwan rawana hua

wo yaad yaad mein jhalka hai aaine ki tarah

is aaine mein kabhi apna samna na hua

wo chand saaten jo us ke sath guzri hain

unhi ka daur raha aur jawedana hua

main us ke hijr ki tarikiyon mein Duba tha

wo aaya ghar mein mere aur charagh-e-KHana hua

wo lauT aaya hai ya meri KHud-farebi hai

nigah kahti hai dekhe use zamana hua

main apne dard ki nisbat ko dil samajhta hun

qafas jo TuT gaya mera aashiyana hua

usi ki yaad hai sarmaya-e-hayat 'zafar'

nahin to mera hai kya main hua hua na hua