wo mile hain magar malul hain hum

vo mile haiñ magar malūl haiñ ham

jo ḳhizāñ meñ khile vo phuul haiñ ham

ham ko zulmat-panāh mat jaano

ik na.ī sub.h ke rasūl haiñ ham

is tavajjoh kā kyā Thikāna hai

terī pahlī nazar kī bhuul haiñ ham

tishnagī to hameñ qubūl na thī

tishnagī ko magar qubūl haiñ ham

us badaltī nigāh se pūchho

ishq kā mo'atabar usuul haiñ ham

kitne be-kaif kis qadar be-rañg

kis kī taḳhlīq kā husūl haiñ ham

pyaar kī chāñdnī meñ khilte haiñ

dasht-e-insāniyat ke phuul haiñ ham

zindagī ne kahā ujālā haiñ

maut ne jab kahā fuzūl haiñ ham

aaj bhī mīr-e-kārvāñ tum ho

aaj bhī rahguzar kī dhuul haiñ ham

wo mile hain magar malul hain hum

jo KHizan mein khile wo phul hain hum

hum ko zulmat-panah mat jaano

ek nai subh ke rasul hain hum

is tawajjoh ka kya Thikana hai

teri pahli nazar ki bhul hain hum

tishnagi to hamein qubul na thi

tishnagi ko magar qubul hain hum

us badalti nigah se puchho

ishq ka mo'atabar usul hain hum

kitne be-kaif kis qadar be-rang

kis ki taKHliq ka husul hain hum

pyar ki chandni mein khilte hain

dasht-e-insaniyat ke phul hain hum

zindagi ne kaha ujala hain

maut ne jab kaha fuzul hain hum

aaj bhi mir-e-karwan tum ho

aaj bhi rahguzar ki dhul hain hum