wo meri raaten meri aankhon mein aa kar le gai

vo mirī rāteñ mirī āñkhoñ meñ aa kar le ga.ī

yaad terī chor thī nīñdeñ churā kar le ga.ī

zindagī kī Diary meñ ek hī to giit thā

koī mīThī dhun use bhī gungunā kar le ga.ī

sardiyoñ kī gungunī sī dhuup ke ehsās tak

mere man kī chāñdnī mujh ko bulā kar le ga.ī

ek ḳhushbū sā maiñ apnī pankhuḌī meñ band thā

aa.ī ik pāgal havā mujh ko uḌā kar le ga.ī

raah meñ thak kar jahāñ baiThī agar ye zindagī

maut aa.ī baañh thāmī aur uThā kar le ga.ī

varna tū bhī raah meñ girtā chalā jaatā 'kuñvar'

vo to ik Thokar thī jo tujh ko bachā kar le ga.ī

wo meri raaten meri aankhon mein aa kar le gai

yaad teri chor thi ninden chura kar le gai

zindagi ki Diary mein ek hi to git tha

koi miThi dhun use bhi gunguna kar le gai

sardiyon ki gunguni si dhup ke ehsas tak

mere man ki chandni mujh ko bula kar le gai

ek KHushbu sa main apni pankhuDi mein band tha

aai ek pagal hawa mujh ko uDa kar le gai

rah mein thak kar jahan baiThi agar ye zindagi

maut aai banh thami aur uTha kar le gai

warna tu bhi rah mein girta chala jata 'kunwar'

wo to ek Thokar thi jo tujh ko bacha kar le gai