wo mujhko main kisi ko manane nikal gaya

vo mujh ko maiñ kisī ko manāne nikal gayā

ik vaqt thā jo vaqt se pahle nikal gayā

māh-o-nujūm kam hue asbāb meñ mire

phir Dar kā āsmān bhī dil se nikal gayā

nāzuk bahut thā us kī galī kā mu'āmla

apnī udāsiyoñ ko sañbhāle nikal gayā

ik baar dil meñ jaagī na.ī aag kī havas

ik rāsta nadī ke kināre nikal gayā

kal mujh ko chhū gayā koī jhoñkā bahār kā

vo bhī zamāna aañkh jhapakte nikal gayā

taufīq-e-she'r mujh ko 'atā bhī huī to kab

jab 'āriz-e-‘arūz se aage nikal gayā

wo mujh ko main kisi ko manane nikal gaya

ek waqt tha jo waqt se pahle nikal gaya

mah-o-nujum kam hue asbab mein mere

phir Dar ka aasman bhi dil se nikal gaya

nazuk bahut tha us ki gali ka mu'amla

apni udasiyon ko sanbhaale nikal gaya

ek bar dil mein jagi nai aag ki hawas

ek rasta nadi ke kinare nikal gaya

kal mujh ko chhu gaya koi jhonka bahaar ka

wo bhi zamana aankh jhapakte nikal gaya

taufiq-e-she'r mujh ko 'ata bhi hui to kab

jab 'ariz-e-‘aruz se aage nikal gaya