wo mujhse is qadar sahma hua hai

vo mujh se is qadar sahmā huā hai

ḳhudā jaane use ye kyā huā hai

maiñ tere rū-barū huuñ yaar phir bhī

tirā chehra bahut utrā huā hai

muqaddar hai ki phir merī ḳhatā.eñ

ġhamoñ ne jo mujhe gherā huā hai

manāne kī use koshish hai jaarī

jo mujh se āj-kal rūThā huā hai

tasavvur meñ basā hai koī shāyad

tabhī chehra tirā nikhrā huā hai

koī to baat hai aisī yaqīnan

vo insāñ āj-kal badlā huā hai

vo merī zindagī thī zindagī hai

tabhī to shahr meñ charchā huā hai

nahīñ suntā kisī kī bhī sadā vo

ye hākim qaum kā bahrā huā hai

salīqe se ġhazal likhnī thī 'ahmad'

magar hālāt ne jakḌā huā hai

wo mujh se is qadar sahma hua hai

KHuda jaane use ye kya hua hai

main tere ru-baru hun yar phir bhi

tera chehra bahut utra hua hai

muqaddar hai ki phir meri KHataen

ghamon ne jo mujhe ghera hua hai

manane ki use koshish hai jari

jo mujh se aaj-kal ruTha hua hai

tasawwur mein basa hai koi shayad

tabhi chehra tera nikhra hua hai

koi to baat hai aisi yaqinan

wo insan aaj-kal badla hua hai

wo meri zindagi thi zindagi hai

tabhi to shahr mein charcha hua hai

nahin sunta kisi ki bhi sada wo

ye hakim qaum ka bahra hua hai

saliqe se ghazal likhni thi 'ahmad'

magar haalat ne jakDa hua hai