wo mujhse mera taaruf karane aaya tha

vo mujh se merā ta.āruf karāne aayā thā

abhī guzar jo gayā ik aziim lamha thā

sunā hai maiñ ne yahāñ surḳh ghaas aa ga.ī thī

vo bādshāh yahīñ apnī jañg haarā thā

hamārī raat se behtar thī agle vaqt kī raat

har ek ghar meñ diyā sub.h tak to jaltā thā

aziiz mujh ko bhī the naqsh apne maazī ke

use bhī shauq purānī imāratoñ kā thā

ab apne sar kā tahaffuz bhī aap ḳhud kiije

fazā meñ aap ne patthar bhī ḳhud uchhālā thā

gayā to apnī udāsī bhī de gayā mujh ko

tamām din jo mire saath hañstā rahtā thā

ab us se ek baḌā naam juḌ gayā 'az.har'

jo shāh-kār mirī fikr ne banāyā thā

wo mujh se mera taaruf karane aaya tha

abhi guzar jo gaya ek azim lamha tha

suna hai main ne yahan surKH ghas aa gai thi

wo baadshah yahin apni jang haara tha

hamari raat se behtar thi agle waqt ki raat

har ek ghar mein diya subh tak to jalta tha

aziz mujh ko bhi the naqsh apne mazi ke

use bhi shauq purani imaraton ka tha

ab apne sar ka tahaffuz bhi aap KHud kije

faza mein aap ne patthar bhi KHud uchhaala tha

gaya to apni udasi bhi de gaya mujh ko

tamam din jo mere sath hansta rahta tha

ab us se ek baDa nam juD gaya 'azhar'

jo shah-kar meri fikr ne banaya tha