وہ مجھے یاد کر رہا ہو گا

وہ مجھے یاد کر رہا ہو گا

اور خود سے الجھ پڑا ہو گا

سوچتا ہوں وہ کس کی بانہوں میں

بعد میرے مچل رہا ہوگا

کچھ نہ ہوگا یہ وہم ہے تیرا

وہ چلے جائیں گے تو کیا ہوگا

دل کسی اور سمت لانے کو

اک نیا شغل ڈھونڈھنا ہوگا

عشرت نیند ترک کر کے اب

اپنے خوابوں کو بیچنا ہوگا

مختصر یہ کہ عیش دل کے لیے

اپنے ماضی کو بھولنا ہوگا

حشر میں ہم کدھر کو جائیں گے

جب ادھر وہ ادھر خدا ہوگا

ہائے خوش فہمیاں تری حیدرؔ

وہ تجھے یاد کر رہا ہوگا