wo muntazir hain hamare to hum kisi ke hain

vo muntazir haiñ hamāre to ham kisī ke haiñ

alāmatoñ meñ ye āsār ḳhud-kushī ke haiñ

pas-e-murād bahut ḳhvāb haiñ nigāhoñ meñ

samundaroñ meñ jazīre ye raushnī ke haiñ

maiñ apne aap ko dushman ke sarf meñ de duuñ

ye mashvare to mirī jaan vāpsī ke haiñ

hujūm-e-aks hai aur ā.īna-sifat huuñ maiñ

so mere jitne bhī dukh haiñ vo āgahī ke haiñ

kisī qabā ko mayassar hai fāḳhera honā

kisī libās meñ paivand muflisī ke haiñ

maiñ us se dukh ke bhī us ko duā.eñ detī huuñ

ajiib rañg mohabbat meñ dushmanī ke haiñ

maiñ jab bhī chāhūñ jabhī us se guftugū kar luuñ

mirī ġhazal pe ye ehsān shā.irī ke haiñ

jo shahr-e-sañg meñ shīsha-mizāj haiñ 'rūhī'

vo zimmedār ḳhud apnī shikastagī ke haiñ

wo muntazir hain hamare to hum kisi ke hain

alamaton mein ye aasar KHud-kushi ke hain

pas-e-murad bahut KHwab hain nigahon mein

samundaron mein jazire ye raushni ke hain

main apne aap ko dushman ke sarf mein de dun

ye mashware to meri jaan wapsi ke hain

hujum-e-aks hai aur aaina-sifat hun main

so mere jitne bhi dukh hain wo aagahi ke hain

kisi qaba ko mayassar hai faKHera hona

kisi libas mein paiwand muflisi ke hain

main us se dukh ke bhi us ko duaen deti hun

ajib rang mohabbat mein dushmani ke hain

main jab bhi chahun jabhi us se guftugu kar lun

meri ghazal pe ye ehsan shairi ke hain

jo shahr-e-sang mein shisha-mizaj hain 'ruhi'

wo zimmedar KHud apni shikastagi ke hain