وہ مسکرا کے جدھر سے نکل گئے ہوں گے

وہ مسکرا کے جدھر سے نکل گئے ہوں گے

نگاہ شوق میں آنسو مچل گئے ہوں گے

گزر کے ہوش کی منزل سے تیرے دیوانے

جنوں کی حد سے بھی آگے نکل گئے ہوں گے

بتان دہر کے وعدے غلط سہی لیکن

ہزار ہا دل ناداں بہل گئے ہوں گے

جو ہم سفر سر منزل نظر نہیں آتے

جنون شوق میں آگے نکل گئے ہوں گے

شب فراق سے گھبرا گئے تھے دیوانے

تلاش صبح سے گھر سے نکل گئے ہوں گے

اک انقلاب سے عالم گزر رہا ہے شمیمؔ

مجھے یقین ہے وہ بھی بدل گئے ہوں گے