وہ نہ آئے تو دیکھو ہر طرف اداسی ہے

وہ نہ آئے تو دیکھو ہر طرف اداسی ہے

پھول بھی ہیں نم دیدہ چاندنی خفا سی ہے

واقعی مری وحشت کچھ تو رنگ لے آئی

مجھ پہ ہنسنے والوں کے رخ پہ بد حواسی ہے

جام دے نہ دے رخ سے بس نقاب سرکا دے

ہر نگاہ اے ساقی میکدے میں پیاسی ہے

مصلحت شعارو ہاں دار ہے مری منزل

جرم عہد حاضر میں صرف حق شناسی ہے

باغباں بہاروں پر کیوں نظر نہیں تیری

شوخ شوخ پھولوں کا رنگ کیوں کپاسی ہے

وہ مرے خیالوں میں ہنس رہے ہیں اے ماہرؔ

صبح خوب صورت ہے شام دل ربا سی ہے