wo na aae to dekho har taraf udasi hai

vo na aa.e to dekho har taraf udāsī hai

phuul bhī haiñ nam-dīda chāñdnī ḳhafā sī hai

vāqa.ī mirī vahshat kuchh to rang le aa.ī

mujh pe hañsne vāloñ ke ruḳh pe bad-havāsī hai

jaam de na de ruḳh se bas naqāb sarkā de

har nigāh ai saaqī mai-kade meñ pyāsī hai

maslahat-shi.āro haañ daar hai mirī manzil

jurm ahd-e-hāzir meñ sirf haq-shanāsī hai

bāġhbāñ bahāroñ par kyoñ nazar nahīñ terī

shoḳh shoḳh phūloñ kā rang kyoñ kapāsī hai

vo mire ḳhayāloñ meñ hañs rahe haiñ ai 'māhir'

sub.h ḳhūbsūrat hai shaam dilrubā sī hai

wo na aae to dekho har taraf udasi hai

phul bhi hain nam-dida chandni KHafa si hai

waqai meri wahshat kuchh to rang le aai

mujh pe hansne walon ke ruKH pe bad-hawasi hai

jam de na de ruKH se bas naqab sarka de

har nigah ai saqi mai-kade mein pyasi hai

maslahat-shiaro han dar hai meri manzil

jurm ahd-e-hazir mein sirf haq-shanasi hai

baghban bahaaron par kyon nazar nahin teri

shoKH shoKH phulon ka rang kyon kapasi hai

wo mere KHayalon mein hans rahe hain ai 'mahir'

subh KHubsurat hai sham dilruba si hai