wo na aur main hi jawan tha pahle

vo na aur maiñ hī javāñ thā pahle

kis qadar amn-o-amāñ thā pahle

vaqt gar sail-e-ravāñ thā pahle

maiñ bhī ik sang-e-girāñ thā pahle

joḌne par bhī nazar aatā hai

baal shīshe meñ jahāñ thā pahle

qurbat-e-yār kā ġham hai na ḳhushī

dil kā ye haal kahāñ thā pahle

ashk-e-larzāñ kī kahī kaun sune

hāsil-e-sharh-e-bayāñ thā pahle

log ab is ko ḳhalal kahte haiñ

ishq ik rāz-e-nihāñ thā pahle

bāzī-e-hāl bisāt-e-māzī

boliye kaun kahāñ thā pahle

mai-kada pahuñche jo us se chhup kar

nāseh maujūd vahāñ thā pahle

thā vo ik lafz-e-mohabbat 'shāhid'

lab pe jo raqs-kunāñ thā pahle

wo na aur main hi jawan tha pahle

kis qadar amn-o-aman tha pahle

waqt gar sail-e-rawan tha pahle

main bhi ek sang-e-giran tha pahle

joDne par bhi nazar aata hai

baal shishe mein jahan tha pahle

qurbat-e-yar ka gham hai na KHushi

dil ka ye haal kahan tha pahle

ashk-e-larzan ki kahi kaun sune

hasil-e-sharh-e-bayan tha pahle

log ab is ko KHalal kahte hain

ishq ek raaz-e-nihan tha pahle

bazi-e-haal bisat-e-mazi

boliye kaun kahan tha pahle

mai-kada pahunche jo us se chhup kar

naseh maujud wahan tha pahle

tha wo ek lafz-e-mohabbat 'shahid'

lab pe jo raqs-kunan tha pahle