وہ نالہ ہی نہیں جو پر افشاں نہیں ہوا

وہ نالہ ہی نہیں جو پر افشاں نہیں ہوا

وہ داغ دل ہی کیا جو نمایاں نہیں ہوا

کب وحشتوں سے دست و گریباں نہیں ہوا

کب دل جنوں کے ہاتھ پریشاں نہیں ہوا

بے کیفیوں کے کیف میں ہم ایسے مست تھے

احساس لذت غم دوراں نہیں ہوا

نوک مژہ پہ قطرۂ اشک آ کے جم گیا

افسوس وہ بھی رونق داماں نہیں ہوا

میری جنوں نوازیٔ پیہم کے شغل سے

مانوس کیوں دماغ گلستاں نہیں ہوا

تحریک اضطراب مسلسل تو دیکھیے

دم بھر سکون قلب کا ساماں نہیں ہوا

دل ہی نہیں وہ دل جو حقیقت میں ہم نشیں

آئینہ دار لذت عرفاں نہیں ہوا

افسانۂ‌ نیاز کی تمہید کیا کہوں

ذوق وفا بھی زینت عنواں نہیں ہوا

تعبیر جس کی زیب نشاط دوام ہو

ایسا تو کوئی خواب پریشاں نہیں ہوا