wo nala hi nahin jo pur-afshan nahin hua

vo naala hī nahīñ jo pur-afshāñ nahīñ huā

vo dāġh-e-dil hī kyā jo numāyāñ nahīñ huā

kab vahshatoñ se dast-o-garebāñ nahīñ huā

kab dil junūñ ke haath pareshāñ nahīñ huā

be-kaifiyoñ ke kaif meñ ham aise mast the

ehsās-e-lazzat-e-ġham-e-daurāñ nahīñ huā

nok-e-mizha pe qatra-e-ashk aa ke jam gayā

afsos vo bhī raunaq-e-dāmāñ nahīñ huā

merī junūñ-navāzī-e-paiham ke shaġhl se

mānūs kyuuñ dimāġh-e-gulistāñ nahīñ huā

tahrīk-e-iztirāb-e-musalsal to dekhiye

dam bhar sukūn-e-qalb kā sāmāñ nahīñ huā

dil hī nahīñ vo dil jo haqīqat meñ ham-nashīñ

ā.īna-dār-e-azzat-e-irfāñ nahīñ huā

afsāna-e-niyāz kī tamhīd kyā kahūñ

zauq-e-vafā bhī zīnat-e-unvāñ nahīñ huā

ta.abīr jis kī zeb-e-nashāt-e-davām ho

aisā to koī ḳhvāb-e-pareshāñ nahīñ huā

wo nala hi nahin jo pur-afshan nahin hua

wo dagh-e-dil hi kya jo numayan nahin hua

kab wahshaton se dast-o-gareban nahin hua

kab dil junun ke hath pareshan nahin hua

be-kaifiyon ke kaif mein hum aise mast the

ehsas-e-lazzat-e-gham-e-dauran nahin hua

nok-e-mizha pe qatra-e-ashk aa ke jam gaya

afsos wo bhi raunaq-e-daman nahin hua

meri junun-nawazi-e-paiham ke shaghl se

manus kyun dimagh-e-gulistan nahin hua

tahrik-e-iztirab-e-musalsal to dekhiye

dam bhar sukun-e-qalb ka saman nahin hua

dil hi nahin wo dil jo haqiqat mein ham-nashin

aaina-dar-e-azzat-e-irfan nahin hua

afsana-e-niyaz ki tamhid kya kahun

zauq-e-wafa bhi zinat-e-unwan nahin hua

tabir jis ki zeb-e-nashat-e-dawam ho

aisa to koi KHwab-e-pareshan nahin hua