وہ ناقۂ خیال سا گزر گیا

وہ ناقۂ خیال سا گزر گیا

ادھر نفس کا کارواں بکھر گیا

یہ کس زمین پر مرے قدم پڑے

وہ کیا غبار تھا کہ میں نکھر گیا

لپٹ کے رو رہی ہیں مجھ سے حیرتیں

ملال تھا کہ رائیگاں سفر گیا

سبھی گماں کی دلدلی زمیں پہ تھے

سو میں بھی اپنے آپ میں اتر گیا

بھٹک رہا ہوں نجد شب میں تارتار

وہ باغ طلعتی مرا کدھر گیا

نوا گران شہر سینہ چاک ہیں

ستم گروں کی داد سے ہنر گیا

وہ کیسا برگزیدۂ ملال تھا

ذرا خوشی ملی تھی اور مر گیا