wo naqa-e-KHayal sa guzar gaya

vo nāqa-e-ḳhayāl sā guzar gayā

idhar nafas kā kārvāñ bikhar gayā

ye kis zamīn par mire qadam paḌe

vo kyā ġhubār thā ki maiñ nikhar gayā

lipaT ke ro rahī haiñ mujh se hairateñ

malāl thā ki rā.egāñ safar gayā

sabhī gumāñ kī daldalī zamīñ pe the

so maiñ bhī apne aap meñ utar gayā

bhaTak rahā huuñ najd-e-shab meñ tār-tār

vo bāġh-e-tal'atī mirā kidhar gayā

navā-garān-e-shahr sīna-chāk haiñ

sitamgaroñ kī daad se hunar gayā

vo kaisā barguzīda-e-malāl thā

zarā ḳhushī milī thī aur mar gayā

wo naqa-e-KHayal sa guzar gaya

idhar nafas ka karwan bikhar gaya

ye kis zamin par mere qadam paDe

wo kya ghubar tha ki main nikhar gaya

lipaT ke ro rahi hain mujh se hairaten

malal tha ki raegan safar gaya

sabhi guman ki daldali zamin pe the

so main bhi apne aap mein utar gaya

bhaTak raha hun najd-e-shab mein tar-tar

wo bagh-e-tal'ati mera kidhar gaya

nawa-garan-e-shahr sina-chaak hain

sitamgaron ki dad se hunar gaya

wo kaisa barguzida-e-malal tha

zara KHushi mili thi aur mar gaya