wo naghmagi ka zaiqa uski sada mein tha

vo naġhmagī kā zā.iqa us kī sadā meñ thā

phailā huā vo nuur sā saarī fazā meñ thā

chup chaap be-zabāñ koī merī anā meñ thā

varna kahāñ ye hausla merī binā meñ thā

vo mere saañs kī dhanak meñ jhūltā thā kaun

kis kā thā rañg-rūp jo husn-e-ḳhalā meñ thā

jo chhū rahā thā mere badan hī ko baar baar

tere ḳhulūs kā koī jhoñkā havā meñ thā

jaañ se guzar ke bhī kabhī shāyad na ye khule

jaadū ye kis nigāh kā merī nigah meñ thā

kal raat bah rahā thā jo bārish ke naam se

merā hī ek ashk-e-tar saarī ghaTā meñ thā

wo naghmagi ka zaiqa us ki sada mein tha

phaila hua wo nur sa sari faza mein tha

chup chap be-zaban koi meri ana mein tha

warna kahan ye hausla meri bina mein tha

wo mere sans ki dhanak mein jhulta tha kaun

kis ka tha rang-rup jo husn-e-KHala mein tha

jo chhu raha tha mere badan hi ko bar bar

tere KHulus ka koi jhonka hawa mein tha

jaan se guzar ke bhi kabhi shayad na ye khule

jadu ye kis nigah ka meri nigah mein tha

kal raat bah raha tha jo barish ke nam se

mera hi ek ashk-e-tar sari ghaTa mein tha