wo nahin hun main ki jis par koi ashk-bar hota

vo nahīñ huuñ maiñ ki jis par koī ashk-bār hotā

kabhī sham.a bhī na rotī jo mirā mazār hotā

shab-e-ġham meñ zindagī kā kise e'tibār hotā

mirī jaan jā chukī thī jo na intizār hotā

mirī dāstān-e-ġham ko vo ġhalat samajh rahe haiñ

kuchh unhīñ kī baat bantī agar e'tibār hotā

yahī soz-e-ishq jis ko maiñ hamesha raaz samjhā

jo hijāb-e-dil na jaltā to na āshkār hotā

maiñ shikāyat zamāna jo karūñ to kyā samajh kar

na ye daur-e-charḳh hotā na ye rozgār hotā

dil-e-pāra-pāra tujh ko koī yuuñ to dafn kartā

vo jidhar nigāh karte udhar ik mazār hotā

mai-e-ishq josh-zan hai ye lahū nahīñ ragoñ meñ

mirā nashsha kyuuñ utartā mujhe kyuuñ ḳhumār hotā

mire dil ne baḌh ke rokā tire tīr-e-jāñ-fishāñ ko

jo ye beach meñ na paḌtā to jigar ke paar hotā

vo lahad pe un kā aanā vo qadam qadam pe mahshar

mirī niiñd kyuuñ uchaTtī agar ek baar hotā

shab-e-hijr ba.ad mere agar is jahāñ meñ rahtī

to yahī siyāh daftar mirā yādgār hotā

jo hamāre dekhne ko kabhī aap aa nikalte

vahī aañkh dar pe hotī vahī intizār hotā

vo shabāb ke fasāne jo maiñ sun rahā huuñ dil se

agar aur koī kahtā to na e'tibār hotā

ye zamāna baḌh rahā hai faqat iztirāb-e-dil se

shab-e-ġham na yuuñ Thahartī jo mujhe qarār hotā

vo jahāñ meñ aag lagtī ki bujhā.e se na bujhtī

mire dūd-e-dil meñ 'sāqib' jo koī sharār hotā

wo nahin hun main ki jis par koi ashk-bar hota

kabhi shama bhi na roti jo mera mazar hota

shab-e-gham mein zindagi ka kise e'tibar hota

meri jaan ja chuki thi jo na intizar hota

meri dastan-e-gham ko wo ghalat samajh rahe hain

kuchh unhin ki baat banti agar e'tibar hota

yahi soz-e-ishq jis ko main hamesha raaz samjha

jo hijab-e-dil na jalta to na aashkar hota

main shikayat zamana jo karun to kya samajh kar

na ye daur-e-charKH hota na ye rozgar hota

dil-e-para-para tujh ko koi yun to dafn karta

wo jidhar nigah karte udhar ek mazar hota

mai-e-ishq josh-zan hai ye lahu nahin ragon mein

mera nashsha kyun utarta mujhe kyun KHumar hota

mere dil ne baDh ke roka tere tir-e-jaan-fishan ko

jo ye beach mein na paDta to jigar ke par hota

wo lahad pe un ka aana wo qadam qadam pe mahshar

meri nind kyun uchaTti agar ek bar hota

shab-e-hijr baad mere agar is jahan mein rahti

to yahi siyah daftar mera yaadgar hota

jo hamare dekhne ko kabhi aap aa nikalte

wahi aankh dar pe hoti wahi intizar hota

wo shabab ke fasane jo main sun raha hun dil se

agar aur koi kahta to na e'tibar hota

ye zamana baDh raha hai faqat iztirab-e-dil se

shab-e-gham na yun Thaharti jo mujhe qarar hota

wo jahan mein aag lagti ki bujhae se na bujhti

mere dud-e-dil mein 'saqib' jo koi sharar hota