wo nahin yaro kisi bhi baat mein

vo nahīñ yaaro kisī bhī baat meñ

jiit kar bhī jo maza hai maat meñ

har kisī ke gird logoñ kā hujūm

har koī tanhā hai apnī zaat meñ

dekhne vaale inheñ paḌh ġhaur se

ek ik duniyā hai in zarrāt meñ

khā ga.ī ab tak ye kitne āftāb

raaz hai muzmar ajab is raat meñ

be-gunāhoñ ke lahū kī surḳhiyāñ

jā bajā bikhrī haiñ aḳhbārāt meñ

aao kāTeñ cake ko imsāl bhī

āñsuoñ kī is bharī barsāt meñ

bach ke rahnā ham se ai dasht-e-junūñ

us kā saayā hai hamāre saat meñ

ai safīrān-e-ziyā ab tum kaho

ab ke sūraj hai hamāre haat meñ

baab meñ us ke hai 'tāhir' aaj bhī

ek sannāTā sā kā.enāt meñ

wo nahin yaro kisi bhi baat mein

jit kar bhi jo maza hai mat mein

har kisi ke gird logon ka hujum

har koi tanha hai apni zat mein

dekhne wale inhen paDh ghaur se

ek ek duniya hai in zarraat mein

kha gai ab tak ye kitne aaftab

raaz hai muzmar ajab is raat mein

be-gunahon ke lahu ki surKHiyan

ja baja bikhri hain aKHbaraat mein

aao kaTen cake ko imsal bhi

aansuon ki is bhari barsat mein

bach ke rahna hum se ai dasht-e-junun

us ka saya hai hamare sat mein

ai safiran-e-ziya ab tum kaho

ab ke suraj hai hamare hat mein

bab mein us ke hai 'tahir' aaj bhi

ek sannaTa sa kaenat mein