wo nazar ruThi hui hai aaj bhi

vo nazar rūThī huī hai aaj bhī

bikhrī bikhrī zindagī hai aaj bhī

TuuTe phūTe gaañv ke ghar meñ nazar

jaane kis ko DhūñDhtī hai aaj bhī

aa ga.ī thī un ke jaane se jo kal

zindagī meñ vo kamī hai aaj bhī

na sahī gahrī barā.e naam hī

un se merī dostī hai aaj bhī

āshiqoñ ke zehn-o-dil par hukmarāñ

husn kī bāzīgarī hai aaj bhī

garmī-e-bāzār ab bhī hai vahāñ

bastiyoñ meñ dilkashī hai aaj bhī

zehn ke tārīk goshoñ meñ abhī

nuqra.ī sī ik hañsī hai aaj bhī

gher letī haiñ jahāñ yādeñ mujhe

us nagar meñ vo galī hai aaj bhī

pī thī un āñkhoñ se ham ne mai kabhī

dil meñ 'anjum' tishnagī hai aaj bhī

wo nazar ruThi hui hai aaj bhi

bikhri bikhri zindagi hai aaj bhi

TuTe phuTe ganw ke ghar mein nazar

jaane kis ko DhunDhti hai aaj bhi

aa gai thi un ke jaane se jo kal

zindagi mein wo kami hai aaj bhi

na sahi gahri barae nam hi

un se meri dosti hai aaj bhi

aashiqon ke zehn-o-dil par hukmaran

husn ki bazigari hai aaj bhi

garmi-e-bazar ab bhi hai wahan

bastiyon mein dilkashi hai aaj bhi

zehn ke tarik goshon mein abhi

nuqrai si ek hansi hai aaj bhi

gher leti hain jahan yaaden mujhe

us nagar mein wo gali hai aaj bhi

pi thi un aankhon se hum ne mai kabhi

dil mein 'anjum' tishnagi hai aaj bhi