وہ پہلے اندھے کنویں میں گرائے جاتے ہیں

وہ پہلے اندھے کنویں میں گرائے جاتے ہیں

جو سنگ شیشے کے گھر میں سجائے جاتے ہیں

عجیب رسم ہے یارو تمہاری محفل میں

دیے جلانے سے پہلے بجھائے جاتے ہیں

ہماری سوچ نے کروٹ یہ کیسی بدلی ہے

ہم اپنی آگ میں خود کو جلائے جاتے ہیں

بڑا ہی زور ہے اس بار منہ کے قطروں میں

کہ پتھروں پہ بھی گھاؤ لگائے جاتے ہیں

عجیب رنگ سے برسات اب کے آئی ہے

کہ لوگ ریت کے گھر بھی بنائے جاتے ہیں

ہماری راکھ سے اٹھے گا اک نیا انساں

اسی خیال سے خود کو جلائے جاتے ہیں

کسی شجر سے کوئی سانپ گر کے کاٹ نہ لے

ہم آج آگ سروں پر اٹھائے جاتے ہیں

ہمارا جسم ہے سائے میں دھوپ سر پر ہے

بڑے ہنر سے وہ روزن بنائے جاتے ہیں

کچھ ایسے فخرؔ چمن کا نظام بدلا ہے

بغیر پانی کے پودے اگائے جاتے ہیں