wo pahle andhe kunen mein girae jate hain

vo pahle andhe kuñ.eñ meñ girā.e jaate haiñ

jo sang shīshe ke ghar meñ sajā.e jaate haiñ

ajiib rasm hai yaaro tumhārī mahfil meñ

diye jalāne se pahle bujhā.e jaate haiñ

hamārī soch ne karvaT ye kaisī badlī hai

ham apnī aag meñ ḳhud ko jalā.e jaate haiñ

baḌā hī zor hai is baar muñh ke qatroñ meñ

ki pattharoñ pe bhī ghaav lagā.e jaate haiñ

ajiib rang se barsāt ab ke aa.ī hai

ki log ret ke ghar bhī banā.e jaate haiñ

hamārī raakh se uTThegā ik nayā insāñ

isī ḳhayāl se ḳhud ko jalā.e jaate haiñ

kisī shajar se koī saañp gir ke kaaT na le

ham aaj aag saroñ par uThā.e jaate haiñ

hamārā jism hai saa.e meñ dhuup sar par hai

baḌe hunar se vo rauzan banā.e jaate haiñ

kuchh aise 'faḳhr' chaman kā nizām badlā hai

baġhair paanī ke paude ugaa.e jaate haiñ

wo pahle andhe kunen mein girae jate hain

jo sang shishe ke ghar mein sajae jate hain

ajib rasm hai yaro tumhaari mahfil mein

diye jalane se pahle bujhae jate hain

hamari soch ne karwaT ye kaisi badli hai

hum apni aag mein KHud ko jalae jate hain

baDa hi zor hai is bar munh ke qatron mein

ki pattharon pe bhi ghaw lagae jate hain

ajib rang se barsat ab ke aai hai

ki log ret ke ghar bhi banae jate hain

hamari rakh se uTThega ek naya insan

isi KHayal se KHud ko jalae jate hain

kisi shajar se koi sanp gir ke kaT na le

hum aaj aag saron par uThae jate hain

hamara jism hai sae mein dhup sar par hai

baDe hunar se wo rauzan banae jate hain

kuchh aise 'faKHr' chaman ka nizam badla hai

baghair pani ke paude ugae jate hain