وہ پہلے دشت کی آب و ہوا کو تولے گا

وہ پہلے دشت کی آب و ہوا کو تولے گا

حساب میرے تنفس کا اب کے جو لے گا

فضا میں رنگ وہ کچھ اس ادا سے گھولے گا

مرے جگر کے لہو سے بدن بھگو لے گا

بڑھا کے سب کی ضرورت کو اشتہاروں سے

جہاں وہ چاہے گا اپنی دکان کھولے گا

بہت کٹھن ہے سمجھنا سیاستیں اس کی

غرض ہوئی تو وہ دشمن کے ساتھ ہو لے گا

خبر ہے گرم کہ طوفان آنے والا ہے

تو کیا مجال کہ پتا بھی کوئی ڈولے گا

ہر ایک شے تو ہے تہذیب کے شکنجے میں

چہک چہک کے گلستاں میں کون بولے گا

سخنوری میں نظر آئے گی تبھی رونق

تو خون دل میں اگر انگلیاں ڈبو لے گا

بکھر رہے ہیں سر بزم قہقہے جس کے

گہر وہ اشک کے تنہائیوں میں رو لے گا

رواں حیات ہے خوابوں کی شاہراہوں پر

ابھی سکون سے ببیاکؔ کیسے سو لے گا