wo pahle dasht ki aab-o-hawa ko tolega

vo pahle dasht kī āb-o-havā ko tolegā

hisāb mere tanaffus kā ab ke jo legā

fazā meñ rang vo kuchh is adā se gholegā

mire jigar ke lahū se badan bhigo legā

baḌhā ke sab kī zarūrat ko ishtihāroñ se

jahāñ vo chāhegā apnī dukān kholegā

bahut kaThin hai samajhnā siyāsateñ us kī

ġharaz huī to vo dushman ke saath ho legā

ḳhabar hai garm ki tūfān aane vaalā hai

to kyā majāl ki pattā bhī koī Dolegā

har ek shai to hai tahzīb ke shikanje meñ

chahak chahak ke gulistāñ meñ kaun bolegā

suḳhanvarī meñ nazar aa.egī tabhī raunaq

tū ḳhūn-e-dil meñ agar uñgliyāñ Dubo legā

bikhar rahe haiñ sar-e-bazm qahqahe jis ke

guhar vo ashk ke tanhā.iyoñ meñ ro legā

ravāñ hayāt hai ḳhvāboñ kī shāh-rāhoñ par

abhī sukūn se 'bebāk' kaise so legā

wo pahle dasht ki aab-o-hawa ko tolega

hisab mere tanaffus ka ab ke jo lega

faza mein rang wo kuchh is ada se gholega

mere jigar ke lahu se badan bhigo lega

baDha ke sab ki zarurat ko ishtihaaron se

jahan wo chahega apni dukan kholega

bahut kaThin hai samajhna siyasaten us ki

gharaz hui to wo dushman ke sath ho lega

KHabar hai garm ki tufan aane wala hai

to kya majal ki patta bhi koi Dolega

har ek shai to hai tahzib ke shikanje mein

chahak chahak ke gulistan mein kaun bolega

suKHanwari mein nazar aaegi tabhi raunaq

tu KHun-e-dil mein agar ungliyan Dubo lega

bikhar rahe hain sar-e-bazm qahqahe jis ke

guhar wo ashk ke tanhaiyon mein ro lega

rawan hayat hai KHwabon ki shah-rahon par

abhi sukun se 'bebak' kaise so lega