wo pahle soch len khilti hui kali kya hai

vo pahle soch leñ khiltī huī kalī kyā hai

jo sochte haiñ ki tarkīb-e-zindagī kyā hai

kidhar hai ġhairat-e-ġham kuchh mujhe sahārā de

vo mujh se pūchh rahe haiñ tirī ḳhushī kyā hai

vafā kā raaz na samjhā sakā koī ab tak

ki us kī kyā hai haqīqat ye vāqa.ī kyā hai

yahī to hotī hai saare ruḳhoñ kā ā.īna

koī samajh ke to dekhe ki be-ruḳhī kyā hai

dam-e-aḳhīr hai kis kā ḳhayāl jalva-faroz

ye merī maut kī had meñ hayāt sī kyā hai

darāz umr ho ai jiine vaale terī magar

jo sirf apne liye ho vo zindagī kyā hai

na jaane kyā ho ki merī hī raushnī meñ shifā

ḳhudī ye soch rahī hai ki be-ḳhudī kyā hai

wo pahle soch len khilti hui kali kya hai

jo sochte hain ki tarkib-e-zindagi kya hai

kidhar hai ghairat-e-gham kuchh mujhe sahaara de

wo mujh se puchh rahe hain teri KHushi kya hai

wafa ka raaz na samjha saka koi ab tak

ki us ki kya hai haqiqat ye waqai kya hai

yahi to hoti hai sare ruKHon ka aaina

koi samajh ke to dekhe ki be-ruKHi kya hai

dam-e-aKHir hai kis ka KHayal jalwa-faroz

ye meri maut ki had mein hayat si kya hai

daraaz umr ho ai jine wale teri magar

jo sirf apne liye ho wo zindagi kya hai

na jaane kya ho ki meri hi raushni mein shifa

KHudi ye soch rahi hai ki be-KHudi kya hai