wo pahli si mujh par inayat nahin hai

vo pahlī sī mujh par ināyat nahīñ hai

mujhe phir bhī tum se shikāyat nahīñ hai

unheñ rahm karne kī aadat nahīñ hai

mirī ashk-rezī kī ḳhaslat nahīñ hai

nazar se pilānā hī kaafī hai saaqī

mujhe jaam kī ab zarūrat nahīñ hai

guzartī hai kaise mirī zindagānī

zabāñ se kaho kaise tāqat nahīñ hai

mulāqāt yuuñ to vo karte haiñ mujh se

magar vālihāna mohabbat nahīñ hai

madad chāhiye sirf ham ko ḳhudā kī

kisī ġhair kī mujh ko hājat nahīñ hai

muqaddar ne jab se kiyā duur tum se

usī vaqt se dil ko rāhat nahīñ hai

ḳhudā jaane gulshan meñ kyā ho gayā hai

vo pahlī sī phūloñ meñ rangat nahīñ hai

nazar pher kar is tarah chal diye vo

ki 'rāhī' se jaise mohabbat nahīñ hai

wo pahli si mujh par inayat nahin hai

mujhe phir bhi tum se shikayat nahin hai

unhen rahm karne ki aadat nahin hai

meri ashk-rezi ki KHaslat nahin hai

nazar se pilana hi kafi hai saqi

mujhe jam ki ab zarurat nahin hai

guzarti hai kaise meri zindagani

zaban se kaho kaise taqat nahin hai

mulaqat yun to wo karte hain mujh se

magar walihana mohabbat nahin hai

madad chahiye sirf hum ko KHuda ki

kisi ghair ki mujh ko hajat nahin hai

muqaddar ne jab se kiya dur tum se

usi waqt se dil ko rahat nahin hai

KHuda jaane gulshan mein kya ho gaya hai

wo pahli si phulon mein rangat nahin hai

nazar pher kar is tarah chal diye wo

ki 'rahi' se jaise mohabbat nahin hai