wo pari-zad hai ye sab ko dikhana tha mujhe

vo parī-zād hai ye sab ko dikhānā thā mujhe

sirf ik baar use haath lagānā thā mujhe

ye to merā hī hunar thā jise iz.hār milā

varna murshid ne kahāñ ism sikhānā thā mujhe

is liye bhī maiñ bahut der se pahuñchā tujh tak

apne qadmoñ kā har ik naqsh miTānā thā mujhe

apnī tairākī bhī karnī thī sabhī par sābit

aur phir ḳhud ko bhī lahroñ se bachānā thā mujhe

maiñ kahānī ko sunāte hue ḳhud hī royā

jab ki qisse ke muḳhātab ko rulānā thā mujhe

ek hī ashk bachā rakhā thā maiñ ne āḳhir

aur usī ashk ko din raat bahānā thā mujhe

merī shohrat ke taqāze hī alag the 'tābish'

gum-shuda rahte hue naam kamānā thā mujhe

wo pari-zad hai ye sab ko dikhana tha mujhe

sirf ek bar use hath lagana tha mujhe

ye to mera hi hunar tha jise izhaar mila

warna murshid ne kahan ism sikhana tha mujhe

is liye bhi main bahut der se pahuncha tujh tak

apne qadmon ka har ek naqsh miTana tha mujhe

apni tairaki bhi karni thi sabhi par sabit

aur phir KHud ko bhi lahron se bachana tha mujhe

main kahani ko sunate hue KHud hi roya

jab ki qisse ke muKHatab ko rulana tha mujhe

ek hi ashk bacha rakha tha main ne aaKHir

aur usi ashk ko din raat bahana tha mujhe

meri shohrat ke taqaze hi alag the 'tabish'

gum-shuda rahte hue nam kamana tha mujhe