wo pau phaTi wo kiran se kiran mein aag lagi

vo pau phaTī vo kiran se kiran meñ aag lagī

vo shab kī zulf-e-shikan-dar-shikan meñ aag lagī

sulag uThī vo ridā-e-nujūm-o-kāhkashāñ

vo dekh dāman-e-charḳh-e-kuhan meñ aag lagī

nashāt-e-garmī-e-mahfil thī jis kī tābānī

isī charāġh se kyuuñ anjuman meñ aag lagī

hazār shams-o-qamar bujh ga.e pa ye na bujhī

ye kis diye se patañgoñ ke man meñ aag lagī

tamām umr ke aañsū use bujhā na sake

jo dil se tā-ba-jigar dam-zadan meñ aag lagī

bhulā sakegī na duniyā ye hādisa ki 'adīb'

charāġh-e-lāla-o-gul se chaman meñ aag lagī

wo pau phaTi wo kiran se kiran mein aag lagi

wo shab ki zulf-e-shikan-dar-shikan mein aag lagi

sulag uThi wo rida-e-nujum-o-kahkashan

wo dekh daman-e-charKH-e-kuhan mein aag lagi

nashat-e-garmi-e-mahfil thi jis ki tabani

isi charagh se kyun anjuman mein aag lagi

hazar shams-o-qamar bujh gae pa ye na bujhi

ye kis diye se patangon ke man mein aag lagi

tamam umr ke aansu use bujha na sake

jo dil se ta-ba-jigar dam-zadan mein aag lagi

bhula sakegi na duniya ye hadisa ki 'adib'

charagh-e-lala-o-gul se chaman mein aag lagi