wo phul jo muskura raha hai

vo phuul jo muskurā rahā hai

shāyad mirā dil jalā rahā hai

chhup kar koī dekhtā hai mujh ko

āñkhoñ meñ magar samā rahā hai

maiñ chāñd ke saath chal rahā huuñ

vo merī hañsī uḌā rahā hai

shāyad kisī daur meñ vafā thī

ye daur to bevafā rahā hai

sau rañg haiñ zindagī ke lekin

insān fareb khā rahā hai

tasvīr bane to mujh se kaise

har naqsh mujhe miTā rahā hai

jo lamha payām hai fanā kā

chup-chāp qarīb aa rahā hai

tūfāñ ne bhī aañkh khol dī hai

sāhil bhī nazar bachā rahā hai

fankār kahūñ use to kaise

taḳhlīq ko jo miTā rahā hai

taqdīr miTā chukī thī jis ko

tadbīr kā raaz pā rahā hai

āvāz se aag lag rahī hai

mutrib hai ki giit gā rahā hai

ehsās-e-shikast-o-kāmrānī

ā.īne ka.ī dikhā rahā hai

vo ḳhāk-nashīñ 'zafar' hai yaaro

jo sū-e-falak bhī jā rahā hai

wo phul jo muskura raha hai

shayad mera dil jala raha hai

chhup kar koi dekhta hai mujh ko

aankhon mein magar sama raha hai

main chand ke sath chal raha hun

wo meri hansi uDa raha hai

shayad kisi daur mein wafa thi

ye daur to bewafa raha hai

sau rang hain zindagi ke lekin

insan fareb kha raha hai

taswir bane to mujh se kaise

har naqsh mujhe miTa raha hai

jo lamha payam hai fana ka

chup-chap qarib aa raha hai

tufan ne bhi aankh khol di hai

sahil bhi nazar bacha raha hai

fankar kahun use to kaise

taKHliq ko jo miTa raha hai

taqdir miTa chuki thi jis ko

tadbir ka raaz pa raha hai

aawaz se aag lag rahi hai

mutrib hai ki git ga raha hai

ehsas-e-shikast-o-kaamrani

aaine kai dikha raha hai

wo KHak-nashin 'zafar' hai yaro

jo su-e-falak bhi ja raha hai