wo pichhle moD par us raste se haT chuka tha

vo pichhle moḌ par us rāste se haT chukā thā

maiñ āñkheñ band kar ke jis ke pīchhe chal rahā thā

tashaḳhḳhus kho rahe the ham badalte pāniyoñ se

hamārā har tanā phailāo meñ ham se judā thā

mohabbat beach meñ dīvār aane se huī thī

ki ham donoñ kā qad dīvār se thoḌā baḌā thā

kisī ke ik qadam se rāstoñ ne samt paa.ī

kisī kī ik jhalak se puurā ā.īna banā thā

vo bāteñ ḳhatm hone par ḳhudā-hāfiz na kah de

maiñ bāteñ karte karte off-line ho gayā thā

añdherā baḌh rahā thā umr kī kachchī saḌak par

safar lāzim thā so raftār ko kam kar diyā thā

vo kamra thā ki vīrānī bharā siina thā 'hāris'

vo ik kone meñ baksā thā ki dil rakkhā huā thā

wo pichhle moD par us raste se haT chuka tha

main aankhen band kar ke jis ke pichhe chal raha tha

tashaKHKHus kho rahe the hum badalte paniyon se

hamara har tana phailao mein hum se juda tha

mohabbat beach mein diwar aane se hui thi

ki hum donon ka qad diwar se thoDa baDa tha

kisi ke ek qadam se raston ne samt pai

kisi ki ek jhalak se pura aaina bana tha

wo baaten KHatm hone par KHuda-hafiz na kah de

main baaten karte karte off-line ho gaya tha

andhera baDh raha tha umr ki kachchi saDak par

safar lazim tha so raftar ko kam kar diya tha

wo kamra tha ki virani bhara sina tha 'haaris'

wo ek kone mein baksa tha ki dil rakkha hua tha