wo pipal ke tale TuTi hui mehrab ka manzar

vo pīpal ke tale TuuTī huī mehrāb kā manzar

dikhā detā hai mujh ko ik dil-e-betāb kā manzar

chalā kar kāġhzī kashtī koī ma.asūm hañstā thā

bahut hī ḳhūb-sūrat thā kabhī tālāb kā manzar

safar vo mutma.in kartā rahā biphre samundar meñ

ki us ke zehn meñ ubhrā na thā girdāb kā manzar

thapeḌoñ meñ bhī sar mahfūz haiñ pakke makānoñ ke

tum āñkheñ khol kar dekho zarā sailāb kā manzar

aqīdat se bahā.e phuul yuuñ jhuk kar pujāran ne

ki rañgīñ ho gayā dariyā meñ ik girdāb kā manzar

sukūñ rāhat tabassum giit sāñsoñ meñ ghulī ḳhushbū

'sadaf' lagtā hai mujh ko ye anokhe ḳhvāb kā manzar

wo pipal ke tale TuTi hui mehrab ka manzar

dikha deta hai mujh ko ek dil-e-betab ka manzar

chala kar kaghzi kashti koi masum hansta tha

bahut hi KHub-surat tha kabhi talab ka manzar

safar wo mutmain karta raha biphre samundar mein

ki us ke zehn mein ubhra na tha girdab ka manzar

thapeDon mein bhi sar mahfuz hain pakke makanon ke

tum aankhen khol kar dekho zara sailab ka manzar

aqidat se bahae phul yun jhuk kar pujaran ne

ki rangin ho gaya dariya mein ek girdab ka manzar

sukun rahat tabassum git sanson mein ghuli KHushbu

'sadaf' lagta hai mujh ko ye anokhe KHwab ka manzar