wo puchhte hain ki main kya hun kya bana raha hun

vo pūchhte haiñ ki maiñ kyā huuñ kyā banā rahā huuñ

ġhazal ke ruup meñ chehra tirā banā rahā huuñ

har ik tarah se mukammal hai go tirī tasvīr

badal badal ke nayā zāviya banā rahā huuñ

abhī ḳhayāl ko vus'at nahīñ milī so maiñ

abhī ḳhayāl meñ tujh ko ḳhudā banā rahā huuñ

chahār samt mujhe kuchh nazar nahīñ aayā

isī liye to tujhe jā-ba-jā banā rahā huuñ

kashīd kar ke maiñ apne ḳhayāl ko mire dost

mohabbatoñ kā nayā silsila banā rahā huuñ

mire 'nadīm' tasavvur meñ tere hai hī nahīñ

baġhaur dekh jo manzar nayā banā rahā huuñ

wo puchhte hain ki main kya hun kya bana raha hun

ghazal ke rup mein chehra tera bana raha hun

har ek tarah se mukammal hai go teri taswir

badal badal ke naya zawiya bana raha hun

abhi KHayal ko wus'at nahin mili so main

abhi KHayal mein tujh ko KHuda bana raha hun

chahaar samt mujhe kuchh nazar nahin aaya

isi liye to tujhe ja-ba-ja bana raha hun

kashid kar ke main apne KHayal ko mere dost

mohabbaton ka naya silsila bana raha hun

mere 'nadim' tasawwur mein tere hai hi nahin

baghaur dekh jo manzar naya bana raha hun