وہ پوچھتے ہیں تو نے تو پیکاں نہیں دیکھا

وہ پوچھتے ہیں تو نے تو پیکاں نہیں دیکھا

گر زخم نہ کہہ دیں تو کہوں ہاں نہیں دیکھا

اللہ رے سیاہی تری اے روز جدائی

وہ دیکھتے ہیں جو شب ہجراں نہیں دیکھا

لائی ہے صبا نکہت گل شاد ہے بلبل

غافل نے مگر رنگ گلستاں نہیں دیکھا

وحشت کدۂ دل کا مرے حال نہ پوچھو

کیا تم نے کوئی خانۂ ویراں نہیں دیکھا

معشوق وفادار بھی ہوتے ہیں بجا ہے

آنکھوں نے تو اے حسن پشیماں نہیں دیکھا

کیوں ہوش نہیں مجھ کو نہ پوچھ آہ یہ ہمدم

تو نے کرم پرسش پنہاں نہیں دیکھا

کوچے میں ترے صدقؔ کو مثل گل‌ و شبنم

خنداں نہیں دیکھا ہے کہ گریاں نہیں دیکھا