wo puchhte hain tu ne to paikan nahin dekha

vo pūchhte haiñ tū ne to paikāñ nahīñ dekhā

gar zaḳhm na kah deñ to kahūñ haañ nahīñ dekhā

allah re siyāhī tirī ai roz-e-judā.ī

vo dekhte haiñ jo shab-e-hijrāñ nahīñ dekhā

laa.ī hai sabā nik.hat-e-gul shaad hai bulbul

ġhāfil ne magar rang-e-gulsitāñ nahīñ dekhā

vahshat-kada-e-dil kā mire haal na pūchho

kyā tum ne koī ḳhāna-e-vīrāñ nahīñ dekhā

mā'shūq vafādār bhī hote haiñ bajā hai

āñkhoñ ne to ai husn pashemāñ nahīñ dekhā

kyoñ hosh nahīñ mujh ko na pūchh aah ye hamdam

tū ne karam-e-pursish-e-pinhāñ nahīñ dekhā

kūche meñ tire 'sidq' ko misl-e-gul-o-shabnam

ḳhandāñ nahīñ dekhā hai ki giryāñ nahīñ dekhā

wo puchhte hain tu ne to paikan nahin dekha

gar zaKHm na kah den to kahun han nahin dekha

allah re siyahi teri ai roz-e-judai

wo dekhte hain jo shab-e-hijran nahin dekha

lai hai saba nikhat-e-gul shad hai bulbul

ghafil ne magar rang-e-gulsitan nahin dekha

wahshat-kada-e-dil ka mere haal na puchho

kya tum ne koi KHana-e-viran nahin dekha

ma'shuq wafadar bhi hote hain baja hai

aankhon ne to ai husn pasheman nahin dekha

kyon hosh nahin mujh ko na puchh aah ye hamdam

tu ne karam-e-pursish-e-pinhan nahin dekha

kuche mein tere 'sidq' ko misl-e-gul-o-shabnam

KHandan nahin dekha hai ki giryan nahin dekha