wo rabt-e-bahami nahin wo pyar bhi nahin

vo rabt-e-bāhamī nahīñ vo pyaar bhī nahīñ

pahlī sī vo nigāh-e-tarahdār bhī nahīñ

ab haal dil kā lā.eq-e-iz.hār bhī nahīñ

jiite haiñ aur jiine ke āsār bhī nahīñ

har-har nafas meñ ziist ke hai ārzū-e-shauq

kam dilkashī meñ ishq kā āzār bhī nahīñ

thī jaan ik amānat-e-yār us ko sauñp dī

ab zindagī ke dosh pe ye baar bhī nahīñ

is daur kī ajiib hai tanzīm dosto

fankār vo banā hai jo fankār bhī nahīñ

daur-e-havas meñ koī bhī pursān-e-ġham nahīñ

apnoñ se kyā shikāyat-e-aġhyār bhī nahīñ

duniyā meñ ek terā sahārā hai ai ḳhudā

tanhā huuñ koī yār-o-madad-gār bhī nahīñ

haq baat 'dard' ahl-e-ḳhirad ko na ho qubūl

'ġhālib' ke log itne taraf-dār bhī nahīñ

wo rabt-e-bahami nahin wo pyar bhi nahin

pahli si wo nigah-e-tarahdar bhi nahin

ab haal dil ka laeq-e-izhaar bhi nahin

jite hain aur jine ke aasar bhi nahin

har-har nafas mein zist ke hai aarzu-e-shauq

kam dilkashi mein ishq ka aazar bhi nahin

thi jaan ek amanat-e-yar us ko saunp di

ab zindagi ke dosh pe ye bar bhi nahin

is daur ki ajib hai tanzim dosto

fankar wo bana hai jo fankar bhi nahin

daur-e-hawas mein koi bhi pursan-e-gham nahin

apnon se kya shikayat-e-aghyar bhi nahin

duniya mein ek tera sahaara hai ai KHuda

tanha hun koi yar-o-madad-gar bhi nahin

haq baat 'dard' ahl-e-KHirad ko na ho qubul

'ghaalib' ke log itne taraf-dar bhi nahin