wo rang nahin shauq ka wo bas nahin hai

vo rang nahīñ shauq kā vo baas nahīñ hai

kuchh hai jo tujhe pā ke mire paas nahīñ hai

ik aa.ina hai aur do hairat-zada āñkheñ

chehra bhī koī dard kā akkās nahīñ hai

yā koī kamī hogī mire ġhuncha-e-dil meñ

yā mujh ko tirī āb-o-havā raas nahīñ hai

jo chāhe vahī mauj-e-havā likh ke chalī jaa.e

kuchh bhī ho ye dil kāġhaz-o-qirtās nahīñ hai

patthar se gurezāñ ho to ye soch lo pahle

dāman meñ koī reza-e-almās nahīñ hai

sahrā kabhī phūloñ se nahīñ māñgtā shabnam

pyāsā hai magar kahtā hai ab pyaas nahīñ hai

kuchh roz mire saath basar kar ke to dekho

phir shauq se kahnā mujhe ehsās nahīñ hai

ābād hai aur hai adam-ābād bhī duniyā

bastī meñ koī dūsrā ban-bās nahīñ hai

yā koī 'kafīl' ālam-e-barzaḳh hai zamīñ par

yā saañs faqat sūrat-e-anfās nahīñ hai

wo rang nahin shauq ka wo bas nahin hai

kuchh hai jo tujhe pa ke mere pas nahin hai

ek aaina hai aur do hairat-zada aankhen

chehra bhi koi dard ka akkas nahin hai

ya koi kami hogi mere ghuncha-e-dil mein

ya mujh ko teri aab-o-hawa ras nahin hai

jo chahe wahi mauj-e-hawa likh ke chali jae

kuchh bhi ho ye dil kaghaz-o-qirtas nahin hai

patthar se gurezan ho to ye soch lo pahle

daman mein koi reza-e-almas nahin hai

sahra kabhi phulon se nahin mangta shabnam

pyasa hai magar kahta hai ab pyas nahin hai

kuchh roz mere sath basar kar ke to dekho

phir shauq se kahna mujhe ehsas nahin hai

aabaad hai aur hai adam-abaad bhi duniya

basti mein koi dusra ban-bas nahin hai

ya koi 'kafil' aalam-e-barzaKH hai zamin par

ya sans faqat surat-e-anfas nahin hai