وہ رنگ و روپ نگاہ و جمال ہے ہی نہیں

وہ رنگ و روپ نگاہ و جمال ہے ہی نہیں

تمہارے حسن کی کوئی مثال ہے ہی نہیں

بیان حسن مکمل کو کوئی کیسے کرے

کسی زبان میں اتنی مجال ہے ہی نہیں

ہر ایک شے کو فنا ہے یہ ہم نے جان لیا

بس ایک عشق ہے جس کو زوال ہے ہی نہیں

اذان اذن عبادت ہے ہاں مگر افسوس

حرم ہے سامنے لیکن بلال ہے ہی نہیں

امیر شہر کو فکر نجات ہے لیکن

فقیر عشق کو کوئی ملال ہے ہی نہیں

خیال حضرت بے دل کو چھو کے آ جائے

کسی کی سوچ میں ایسا کمال ہے ہی نہیں

جواب دینے کو حاضر ہوں میں مگر صاحب

کسی کے لب پہ کوئی بھی سوال ہے ہی نہیں