wo rang rang dhup thi ki raat raat KHwab hai

vo rang rang dhuup thī ki raat raat ḳhvāb hai

ye maiñ huuñ raushnī meñ yā koī nayā sarāb hai

mire qarīb zindagī kā qatl-e-'ām hai vahī

aur āsmān par vahī tulū'-e-āftāb hai

hare-bhare vujūd Tahniyoñ pe naam likh chuke

bahār kyāriyoñ meñ ab khulī huī kitāb hai

maiñ aise ḳhvāb se panāh māñgtī rahī sadā

ki jis ke baad ratjagoñ kā be-karāñ 'azāb hai

bujhī huī hañsī jale hue gharoñ ke ḳhāl-o-ḳhad

kisī na.e savāl kā koī nayā javāb hai

tamām shahr 'aks 'aks sar-burīda ho gayā

ye ā.inoñ kā ek ek fard se hisāb hai

koī to sabz pal 'humairā' apne aap ko mile

ka.ī dinoñ se fursatoñ kā zā.iqa ḳharāb hai

wo rang rang dhup thi ki raat raat KHwab hai

ye main hun raushni mein ya koi naya sarab hai

mere qarib zindagi ka qatl-e-'am hai wahi

aur aasman par wahi tulu'-e-aftab hai

hare-bhare wujud Tahniyon pe nam likh chuke

bahaar kyariyon mein ab khuli hui kitab hai

main aise KHwab se panah mangti rahi sada

ki jis ke baad ratjagon ka be-karan 'azab hai

bujhi hui hansi jale hue gharon ke KHal-o-KHad

kisi nae sawal ka koi naya jawab hai

tamam shahr 'aks 'aks sar-burida ho gaya

ye aainon ka ek ek fard se hisab hai

koi to sabz pal 'humaira' apne aap ko mile

kai dinon se fursaton ka zaiqa KHarab hai