wo rashk-e-mehr-o-qamar ghat par nahin aata

vo rashk-e-mehr-o-qamar ghaat par nahīñ aatā

kabhī añdhere-ujāle nazar nahīñ aatā

ye kah do kūcha-e-jānāñ ke jaane vāloñ se

udhar jo koī gayā phir idhar nahīñ aatā

tilā.ī-rañg ye kyā kyā chale haiñ talvāreñ

kisī ke qabze meñ vo kunj-e-zar nahīñ aatā

vo nā-tavāñ huuñ ki suntā nahīñ koī merī

vo zaar huuñ ki kisī ko nazar nahīñ aatā

mirī taraf se ye ġhaflat hai ham-safīroñ ko

chaman se uḌ ke kabhī ek par nahīñ aatā

nahīñ nasīb meñ apnī jo daulat-e-bedār

to ḳhvāb meñ bhī mirā svayamvar nahīñ aatā

azāb-e-naz.a hī qāsid kā intizār mujhe

ajal hī aa.e agar nāma-bar nahīñ aatā

vo kaun log haiñ jin par humā hai sāya-fagan

yahāñ to buum bhī bālā-e-sar nahīñ aatā

yahāñ vasīla-e-rozī faqat hai yād-e-ḳhudā

ki hech-kāra haiñ koī hunar nahīñ aatā

bashar ko chāhne anjām-e-kār kī kuchh fikr

jahān meñ koī bār-e-digar nahīñ aatā

sanam ko haath se jaane na dījiye ai 'bahr'

nikal ke musht-e-sadaf se guhar nahīñ aatā

wo rashk-e-mehr-o-qamar ghat par nahin aata

kabhi andhere-ujale nazar nahin aata

ye kah do kucha-e-jaanan ke jaane walon se

udhar jo koi gaya phir idhar nahin aata

tilai-rang ye kya kya chale hain talwaren

kisi ke qabze mein wo kunj-e-zar nahin aata

wo na-tawan hun ki sunta nahin koi meri

wo zar hun ki kisi ko nazar nahin aata

meri taraf se ye ghaflat hai ham-safiron ko

chaman se uD ke kabhi ek par nahin aata

nahin nasib mein apni jo daulat-e-bedar

to KHwab mein bhi mera swayamwar nahin aata

azab-e-naza hi qasid ka intizar mujhe

ajal hi aae agar nama-bar nahin aata

wo kaun log hain jin par huma hai saya-fagan

yahan to bum bhi baala-e-sar nahin aata

yahan wasila-e-rozi faqat hai yaad-e-KHuda

ki hech-kara hain koi hunar nahin aata

bashar ko chahne anjam-e-kar ki kuchh fikr

jahan mein koi bar-e-digar nahin aata

sanam ko hath se jaane na dijiye ai 'bahr'

nikal ke musht-e-sadaf se guhar nahin aata