wo rokta hai mujhe shahr mein nikalne se

vo roktā hai mujhe shahr meñ nikalne se

bhaḌak uThūñ na kahīñ āñdhiyoñ meñ jalne se

ye tarz-e-talḳh-navā.ī kuchh itnī sahl nahīñ

zabāñ pe aable paḌ jaa.eñ sach ugalne se

ḳhalā havā.ī sahāroñ se pur nahīñ hotā

buland hotā hai insāñ kahīñ uchhalne se

ḳhud apne-āp se poshīda rahnā nā-mumkin

nazar badaltī nahīñ aa.ina badalne se

khaḌā huuñ maiñ kisī girtī huī fasīl pe kyā

tavāzun aur bigaḌne lagā sambhalne se

baḌe ḳhulūs se māñgī thī raushnī kī duā

baḌhā kuchh aur añdherā charāġh jalne se

luTā diyā jinheñ jiitī huī raqam kī tarah

vo din palaT to na ā.eñge haath milne se

chhaTegī kaise 'muzaffar' siyāhī qismat kī

nikal to aa.egā ḳhurshīd raat Dhalne se

wo rokta hai mujhe shahr mein nikalne se

bhaDak uThun na kahin aandhiyon mein jalne se

ye tarz-e-talKH-nawai kuchh itni sahl nahin

zaban pe aable paD jaen sach ugalne se

KHala hawai sahaaron se pur nahin hota

buland hota hai insan kahin uchhalne se

KHud apne-ap se poshida rahna na-mumkin

nazar badalti nahin aaina badalne se

khaDa hun main kisi girti hui fasil pe kya

tawazun aur bigaDne laga sambhalne se

baDe KHulus se mangi thi raushni ki dua

baDha kuchh aur andhera charagh jalne se

luTa diya jinhen jiti hui raqam ki tarah

wo din palaT to na aaenge hath milne se

chhaTegi kaise 'muzaffar' siyahi qismat ki

nikal to aaega KHurshid raat Dhalne se