wo roz naya fitna uThane pe laga hai

vo roz nayā fitna uThāne pe lagā hai

kam-zarf hai zaat apnī dikhāne pe lagā hai

maiñ chāhtā huuñ ḳhatm ho ye aapsī nafrat

vo hai ki faqat baat baḌhāne pe lagā hai

dushman ko taḌaptā huā chhoḌ aaya huuñ maiñ bhī

har tiir mirā jā ke nishāne pe lagā hai

haq baat kī tā.īd koī jurm ho jaise

har shaḳhs mujhe āñkheñ dikhāne pe lagā hai

jis shaḳhs kī apnī koī pahchān nahīñ hai

vo nām-o-nishāñ merā miTāne pe lagā hai

maiñ itnā pareshān to ḳhud se bhī nahīñ thā

jo sadma tire chhoḌ ke jaane pe lagā hai

nākām thā nākām hai nākām rahegā

bekār ye dil us ko bhulāne pe lagā hai

insāf kī ummīd rakhūñ kis se 'sulaimān'

munsif mire qātil ko bachāne pe lagā hai

wo roz naya fitna uThane pe laga hai

kam-zarf hai zat apni dikhane pe laga hai

main chahta hun KHatm ho ye aapsi nafrat

wo hai ki faqat baat baDhane pe laga hai

dushman ko taDapta hua chhoD aaya hun main bhi

har tir mera ja ke nishane pe laga hai

haq baat ki taid koi jurm ho jaise

har shaKHs mujhe aankhen dikhane pe laga hai

jis shaKHs ki apni koi pahchan nahin hai

wo nam-o-nishan mera miTane pe laga hai

main itna pareshan to KHud se bhi nahin tha

jo sadma tere chhoD ke jaane pe laga hai

nakaam tha nakaam hai nakaam rahega

bekar ye dil us ko bhulane pe laga hai

insaf ki ummid rakhun kis se 'sulaiman'

munsif mere qatil ko bachane pe laga hai