wo rudad-e-gham par bahut muskurae

vo rūdād-e-ġham par bahut muskurā.e

magar phir bhī āñkhoñ meñ aañsū bhar aa.e

nazar merī bahkī qadam laḌkhaḌā.e

mohabbat meñ kyā kyā maqāmāt aa.e

mohabbat kā banda vafā kā pujārī

tire dar se ham ne bahut naam paa.e

na jaane kab un kī nazar kā talavvun

miTā kar banā.e banā kar miTā.e

kabhī intizār aur kabhī be-qarārī

mohabbat meñ ham ne ye ārām paa.e

kalī dil-girafta udāsī guloñ par

chaman meñ mujhe tum bahut yaad aa.e

shab-e-ġham unhīñ ke tasavvur meñ guzrī

kabhī aah khīñchī kabhī muskurā.e

nigāhoñ se un kī nigāheñ milā kar

ham apnā fasāna sunāne na paa.e

ik aisī masarrat kā lamha bhī aaya

na tum muskurā.e na ham muskurā.e

nahīñ āstāñ koī sajde ke qābil

kahāñ terā 'sājid' sar apnā jhukā.e

wo rudad-e-gham par bahut muskurae

magar phir bhi aankhon mein aansu bhar aae

nazar meri bahki qadam laDkhaDae

mohabbat mein kya kya maqamat aae

mohabbat ka banda wafa ka pujari

tere dar se hum ne bahut nam pae

na jaane kab un ki nazar ka talawwun

miTa kar banae bana kar miTae

kabhi intizar aur kabhi be-qarari

mohabbat mein hum ne ye aaram pae

kali dil-girafta udasi gulon par

chaman mein mujhe tum bahut yaad aae

shab-e-gham unhin ke tasawwur mein guzri

kabhi aah khinchi kabhi muskurae

nigahon se un ki nigahen mila kar

hum apna fasana sunane na pae

ek aisi masarrat ka lamha bhi aaya

na tum muskurae na hum muskurae

nahin aastan koi sajde ke qabil

kahan tera 'sajid' sar apna jhukae