وہ روح گلستاں ہے فطرت کی نشانی ہے

وہ روح گلستاں ہے فطرت کی نشانی ہے

پھولوں کی لطافت ہے کلیوں کی جوانی ہے

اک درد کا قصہ ہے اک غم کی کہانی ہے

جذبات کی شدت ہے اشکوں کی روانی ہے

ہر دور کے دامن سے وابستہ اسے کہیے

یہ میرا فسانہ ہے یہ میری کہانی ہے

دونوں سے محبت کی آباد ہوئی دنیا

میں تیرا فسانہ ہوں تو میری کہانی ہے

دنیا کو ابھی تک یہ معلوم نہیں شاید

وہ جان طلب میرے خوابوں کی نشانی ہے

مے خانۂ الفت کے ہیں توبہ شکن لمحے

مے خانۂ الفت کی ہر شام سہانی ہے

چھیڑی جو غزل میں نے ارباب سخن بولے

کیا حسن ہے شعروں میں کیا جادو بیانی ہے

اے ظلم کے متوالے کیوں اس کو بہاتے ہو

یہ خون ہے انساں کا صہبا ہے نہ پانی ہے

جو اہل محبت ہیں کہہ دو یہ نگارؔ ان سے

آفات سے ٹکرانا عزت کی نشانی ہے