wo ruh-e-gulistan hai fitrat ki nishani hai

vo rūh-e-gulistāñ hai fitrat kī nishānī hai

phūloñ kī latāfat hai kaliyoñ kī javānī hai

ik dard kā qissa hai ik ġham kī kahānī hai

jazbāt kī shiddat hai ashkoñ kī ravānī hai

har daur ke dāman se vābasta use kahiye

ye merā fasāna hai ye merī kahānī hai

donoñ se mohabbat kī ābād huī duniyā

maiñ terā fasāna huuñ tū merī kahānī hai

duniyā ko abhī tak ye ma.alūm nahīñ shāyad

vo jān-e-talab mere ḳhvāboñ kī nishānī hai

mai-ḳhāna-e-ulfat ke haiñ tauba-shikan lamhe

mai-ḳhāna-e-ulfat kī har shaam suhānī hai

chheḌī jo ġhazal maiñ ne arbāb-e-suḳhan bole

kyā husn hai sheroñ meñ kyā jādū-bayānī hai

ai zulm ke matvāle kyoñ is ko bahāte ho

ye ḳhuun hai insāñ kā sahbā hai na paanī hai

jo ahl-e-mohabbat haiñ kah do ye 'nigār' un se

āfāt se Takrānā izzat kī nishānī hai

wo ruh-e-gulistan hai fitrat ki nishani hai

phulon ki latafat hai kaliyon ki jawani hai

ek dard ka qissa hai ek gham ki kahani hai

jazbaat ki shiddat hai ashkon ki rawani hai

har daur ke daman se wabasta use kahiye

ye mera fasana hai ye meri kahani hai

donon se mohabbat ki aabaad hui duniya

main tera fasana hun tu meri kahani hai

duniya ko abhi tak ye malum nahin shayad

wo jaan-e-talab mere KHwabon ki nishani hai

mai-KHana-e-ulfat ke hain tauba-shikan lamhe

mai-KHana-e-ulfat ki har sham suhani hai

chheDi jo ghazal main ne arbab-e-suKHan bole

kya husn hai sheron mein kya jadu-bayani hai

ai zulm ke matwale kyon is ko bahate ho

ye KHun hai insan ka sahba hai na pani hai

jo ahl-e-mohabbat hain kah do ye 'nigar' un se

aafat se Takrana izzat ki nishani hai