wo saf ruKH pe jo zulf-e-siyah-fam nahin

vo saaf ruḳh pe jo zulf-e-siyāh-fām nahīñ

patā ye hai ki halab ke qarīb shaam nahīñ

tumhāre ruḳh se kuchh achchhā mah-e-tamām nahīñ

tumhāre qasr se ūñchā falak kā baam nahīñ

vo kaam le ke bhī kahte haiñ tujh se kaam nahīñ

salām aisī itā'at ko maiñ ġhulām nahīñ

kabhī hai dasht-navardī kabhī haiñ gulshan meñ

ġharaz junūñ meñ hamārā kahīñ qayām nahīñ

vo shām-e-vasl hai ai ham-nashīñ sahar jis kī

vo sub.h-e-hijr hai ai dil ki jis kī shaam nahīñ

huī hai ab to unheñ lafz lafz se nafrat

javāb-e-ḳhat meñ kahīñ daad saad laam nahīñ

sharāb-ḳhāna-e-duniyā meñ ai balā-nosho

kisī ko sāġhar-e-mai kī tarah qayām nahīñ

pilā de muft mujhe ai saḳhī ke laal sharāb

ġharīb-e-riñd huuñ merī girah meñ daam nahīñ

hazār 'aib haiñ ham meñ magar vo hai sattār

ḳhudā kā shukr hai badnām apnā naam nahīñ

bas aaj roz kā jhagḌā miTā de ai qātil

'adū nahīñ tirī mahfil meñ yā ġhulām nahīñ

hazār kabk ko ho naaz chaal par apnī

magar vo aap ke mānind ḳhush-ḳhirām nahīñ

ye kis ke paañv ke chhāle ne kar diyā sairāb

jo aaj ḳhār-e-bayābāñ bhī tishna-kām nahīñ

savāl-e-vasl pe lillāh aaj haañ kah de

dahan se tere nikaltā rahā mudām nahīñ

dikhā ke abrū-e-pur-ḳham kahā ye zālim ne

kare na chaak kaleja ye vo husām nahīñ

na sub.h-e-vasl karo vā'da shaam kā sāhab

yahāñ hai sham'-e-sahar ārzū-e-shām nahīñ

piyāla duudh kā gāloñ ke sāmne hai rakkhā

vo gaal par tire zulf-e-siyāh-fām nahīñ

janāb-e-shaiḳh bhī aa jaa.eñ to pilā.ūñ unheñ

ye māh-e-īd hai 'sābir' mah-e-siyām nahīñ

maiñ un se daad bhī letā nahīñ huuñ ai 'sābir'

samajhte mere suḳhan ko agar avaam nahīñ

wo saf ruKH pe jo zulf-e-siyah-fam nahin

pata ye hai ki halab ke qarib sham nahin

tumhaare ruKH se kuchh achchha mah-e-tamam nahin

tumhaare qasr se uncha falak ka baam nahin

wo kaam le ke bhi kahte hain tujh se kaam nahin

salam aisi ita'at ko main ghulam nahin

kabhi hai dasht-nawardi kabhi hain gulshan mein

gharaz junun mein hamara kahin qayam nahin

wo sham-e-wasl hai ai ham-nashin sahar jis ki

wo subh-e-hijr hai ai dil ki jis ki sham nahin

hui hai ab to unhen lafz lafz se nafrat

jawab-e-KHat mein kahin dad sad lam nahin

sharab-KHana-e-duniya mein ai bala-nosho

kisi ko saghar-e-mai ki tarah qayam nahin

pila de muft mujhe ai saKHi ke lal sharab

gharib-e-rind hun meri girah mein dam nahin

hazar 'aib hain hum mein magar wo hai sattar

KHuda ka shukr hai badnam apna nam nahin

bas aaj roz ka jhagDa miTa de ai qatil

'adu nahin teri mahfil mein ya ghulam nahin

hazar kabk ko ho naz chaal par apni

magar wo aap ke manind KHush-KHiram nahin

ye kis ke panw ke chhaale ne kar diya sairab

jo aaj KHar-e-bayaban bhi tishna-kaam nahin

sawal-e-wasl pe lillah aaj han kah de

dahan se tere nikalta raha mudam nahin

dikha ke abru-e-pur-KHam kaha ye zalim ne

kare na chaak kaleja ye wo husam nahin

na subh-e-wasl karo wa'da sham ka sahab

yahan hai sham'-e-sahar aarzu-e-sham nahin

piyala dudh ka galon ke samne hai rakkha

wo gal par tere zulf-e-siyah-fam nahin

janab-e-shaiKH bhi aa jaen to pilaun unhen

ye mah-e-id hai 'sabir' mah-e-siyam nahin

main un se dad bhi leta nahin hun ai 'sabir'

samajhte mere suKHan ko agar awam nahin