wo sab se aage andhere mein jo charagh thame khaDa hua hai

vo sab se aage añdhere meñ jo charāġh thāme khaḌā huā hai

siyāh rātoñ meñ gum-shuda manziloñ ko rasta dikhā rahā hai

jhulaste mausam meñ munharif hai parā.e peḌoñ kī chhāoñ tak se

anā kā rutba baḌhāyā us ne vo apnī shartoñ pe jī rahā hai

havā kī marzī diyā bujhā.e yā ḳhushbuoñ ko rihā.ī de de

kahīñ pe dīvār hai ye goyā kahīñ kahīñ par ye rāsta hai

tū jāntā hai tirī nazar se har ek manzar ko dekhtī huuñ

tujhe pata hai ki terī āñkhoñ kā rang bilkul mirī tarah hai

badaltī rut meñ badal gayā hai hamārī nazroñ kā zāviya bhī

udaas pattoñ pe ruup aayā ḳhizāñ kā chehra damak rahā hai

guzar chukā hai vo is saḌak se baḌī ḳhamoshī ke saath ab ke

ye koī dastak nahīñ hai dar par havā kī sāzish hai vāhima hai

ye terī nisbat kā faiz hai jo Tale hue haiñ 'azāb saare

ye merī duniyā meñ ab talak jo bhī ḳhair hai vo tirī du'ā hai

wo sab se aage andhere mein jo charagh thame khaDa hua hai

siyah raaton mein gum-shuda manzilon ko rasta dikha raha hai

jhulaste mausam mein munharif hai parae peDon ki chhaon tak se

ana ka rutba baDhaya us ne wo apni sharton pe ji raha hai

hawa ki marzi diya bujhae ya KHushbuon ko rihai de de

kahin pe diwar hai ye goya kahin kahin par ye rasta hai

tu jaanta hai teri nazar se har ek manzar ko dekhti hun

tujhe pata hai ki teri aankhon ka rang bilkul meri tarah hai

badalti rut mein badal gaya hai hamari nazron ka zawiya bhi

udas patton pe rup aaya KHizan ka chehra damak raha hai

guzar chuka hai wo is saDak se baDi KHamoshi ke sath ab ke

ye koi dastak nahin hai dar par hawa ki sazish hai wahima hai

ye teri nisbat ka faiz hai jo Tale hue hain 'azab sare

ye meri duniya mein ab talak jo bhi KHair hai wo teri du'a hai