wo samundar se sada deta hai

vo samundar se sadā detā hai

aag paanī meñ lagā detā hai

DhūñDhne vaalā use aaTh pahar

be-karānī kī sadā detā hai

har qadam besh hai vo naqsh-e-qadam

paaoñ imkāñ ke hilā detā hai

kyā tamāshā hai mirā zauq-e-numū

chuTkiyoñ meñ jo uḌā detā hai

dasht-e-aflāk ke sab sang-o-shajar

merī rāhoñ meñ sajā detā hai

duur ufuq paar mire dil ke liye

ek tasvīr banā detā hai

kitnā ḳhvāhāñ hai chaman-rezī kā

muTThiyoñ-bhar jo havā detā hai

ḳhauf detā hai mujhe vaqt-e-duā

kis ta'alluq kā sila detā hai

mujh ko luḌhkā ke pahāḌoñ se kahīñ

qahqaha ek lagā detā hai

phir bulā kar vo mujhe hashr ke din

faisla apnā sunā detā hai

wo samundar se sada deta hai

aag pani mein laga deta hai

DhunDhne wala use aaTh pahar

be-karani ki sada deta hai

har qadam besh hai wo naqsh-e-qadam

paon imkan ke hila deta hai

kya tamasha hai mera zauq-e-numu

chuTkiyon mein jo uDa deta hai

dasht-e-aflak ke sab sang-o-shajar

meri rahon mein saja deta hai

dur ufuq par mere dil ke liye

ek taswir bana deta hai

kitna KHwahan hai chaman-rezi ka

muTThiyon-bhar jo hawa deta hai

KHauf deta hai mujhe waqt-e-dua

kis ta'alluq ka sila deta hai

mujh ko luDhka ke pahaDon se kahin

qahqaha ek laga deta hai

phir bula kar wo mujhe hashr ke din

faisla apna suna deta hai