wo sanam jo mehr-ezar hai use humse milne mein aar hai

vo sanam jo mehr-ezār hai use ham se milne meñ aar hai

vale apnā jo dil-e-zār hai vo hazār jaañ se nisār hai

mile jab se kūche meñ us ke jā ye surūr-e-aish hai barmalā

lab-e-dil hai aur vo naqsh-e-pā bar-e-jāñ hai aur dar-e-yār hai

vo nigah jo us kī hai fitna-gar use mashq-e-said hai pesh-tar

hai jo dil kā tā.ir-e-tez-par usī baaz kā ye shikār hai

vo mizha lagā ke jo ek sināñ ga.ī phir to kar na dil ab fuġhāñ

ka.ī aise hoveñge imtihāñ ye abhī to pahlā hī vaar hai

jo bahār gul pe rahī hai tul hameñ kyā jo husn kī pī hai mul

jinheñ chāhiye hai vo rashk-e-gul unheñ gul se kyā sarokār hai

jo butoñ ko deveñ dil aur diiñ rakheñ us ko ye ba-alam qarīñ

bhalā kahiye kyā use ham-nashīñ ye ajab kuchh un kā shi.ār hai

ka.ī din hue haiñ 'nazīr' ab ki ḳhafā hai ham se vo ġhuncha-lab

use kyā vale hameñ roz-o-shab na to sabr hai na qarār hai

wo sanam jo mehr-ezar hai use hum se milne mein aar hai

wale apna jo dil-e-zar hai wo hazar jaan se nisar hai

mile jab se kuche mein us ke ja ye surur-e-aish hai barmala

lab-e-dil hai aur wo naqsh-e-pa bar-e-jaan hai aur dar-e-yar hai

wo nigah jo us ki hai fitna-gar use mashq-e-said hai pesh-tar

hai jo dil ka tair-e-tez-par usi baz ka ye shikar hai

wo mizha laga ke jo ek sinan gai phir to kar na dil ab fughan

kai aise howenge imtihan ye abhi to pahla hi war hai

jo bahaar gul pe rahi hai tul hamein kya jo husn ki pi hai mul

jinhen chahiye hai wo rashk-e-gul unhen gul se kya sarokar hai

jo buton ko dewen dil aur din rakhen us ko ye ba-alam qarin

bhala kahiye kya use ham-nashin ye ajab kuchh un ka shiar hai

kai din hue hain 'nazir' ab ki KHafa hai hum se wo ghuncha-lab

use kya wale hamein roz-o-shab na to sabr hai na qarar hai